कुडाळ एमआयडीसीतील राणेंच्या कंपन्यांच्या जागांवर आधी उद्योग सुरू करा; मगच विकास करा – वैभव नाईक

कुडाळ एमआयडीसीतील राणेंच्या कंपन्यांच्या जागांवर आधी उद्योग सुरू करा; मगच विकास करा – वैभव नाईक

आमदार निलेश राणेंवर माजी आमदारांचा निशाणा; ४० एकर जागांवर उद्योग सुरू नसल्याचा आरोप, एमआयडीसीतील रस्त्यांच्या कामावरूनही सवाल

कुडाळ :

‘२१ व्या शतकातील कुडाळ एमआयडीसी साकारण्याच्या बाता करण्यापूर्वी राणेंच्या कंपन्यांनी एमआयडीसीमध्ये घेतलेल्या जागांवर आधी उद्योग सुरू करावेत,’ असा टोला कुडाळ-मालवणचे माजी आमदार वैभव नाईक यांनी आमदार निलेश राणे यांना लगावला आहे.

आमदार निलेश राणे यांनी अलीकडेच ‘२१ व्या शतकातील कुडाळ एमआयडीसी’ साकारण्याबाबत वक्तव्य केले होते. या वक्तव्यावर प्रतिक्रिया देताना वैभव नाईक यांनी नारायण राणे यांच्या राजकीय कारकिर्दीचा संदर्भ देत टीका केली. नारायण राणे यांनी मुख्यमंत्री, महसूल मंत्री, उद्योगमंत्री, सिंधुदुर्गचे पालकमंत्री, राज्यसभा खासदार तसेच केंद्रात सूक्ष्म, लघु व मध्यम उद्योगमंत्री अशी विविध पदे भूषविली. मात्र, एवढ्या मोठ्या कालावधीत कुडाळ एमआयडीसी किंवा जिल्ह्यातील अन्य एमआयडीसीमध्ये अपेक्षित उद्योग आणण्यात त्यांना यश आले नाही, असा आरोप नाईक यांनी केला.

नाईक यांनी पुढे आरोप केला की, निलेश राणे खासदार असताना आणि नारायण राणे उद्योगमंत्री असताना राणे कुटुंबाशी संबंधित कंपन्यांनी सिंधुदुर्ग जिल्ह्यातील एमआयडीसीमध्ये सुमारे ४० एकर जागा घेतली. मात्र, या जागांवर अद्याप रोजगारनिर्मिती करणारे उद्योग सुरू झालेले नाहीत. त्यामुळे या जागांचा उपयोग करून आधी उद्योग सुरू करावेत आणि त्यानंतरच नव्या एमआयडीसीच्या विकासाबाबत बोलावे, असे आव्हान त्यांनी दिले. याचबरोबर एमआयडीसीतील ३० कोटी रुपयांच्या रस्त्यांच्या कामात आमदार निलेश राणे यांचे कमिशन किती, असा सवालही त्यांनी उपस्थित केला. हा आरोप असून त्याबाबत संबंधितांची अधिकृत भूमिका समोर आलेली नाही.

आपल्या आमदारकीच्या कार्यकाळात कुडाळ एमआयडीसीमध्ये विविध उद्योग आणल्याचा दावा वैभव नाईक यांनी केला. यामध्ये बजाज राईस मिल, गोदरेज कंपनी, दोन काजू प्रक्रिया उद्योग, काथ्या उद्योग, दोन वॉटर बॉटल कंपन्या आणि मत्स्य जाळी बनविणारी ग्रँफिशर नेट्स कंपनी यांचा समावेश असल्याचे त्यांनी सांगितले. उद्योजकांना एमआयडीसीमध्ये जागा आणि आवश्यक सुविधा सहज उपलब्ध व्हाव्यात, यासाठी आपण प्रयत्न केले होते, असेही ते म्हणाले.

गेल्या साडेतीन वर्षांत महायुती सरकार सत्तेवर आल्यापासून एमआयडीसीमध्ये राजकीय हस्तक्षेप वाढल्याचा आरोपही नाईक यांनी केला. उद्योजकांना जागा आणि इतर सुविधा मिळण्यात अडचणी येत असल्याने स्थानिक नवीन उद्योजक एमआयडीसीमध्ये येण्यास उत्सुक नसल्याचे त्यांनी सांगितले. दुसरीकडे, परप्रांतीय व्यक्तींना व्यावसायिक जागा तातडीने उपलब्ध करून दिल्या जात असल्याचा आरोपही त्यांनी केला.

आपल्या कार्यकाळात सुरू झालेल्या उद्योगांमुळे आजही अनेक युवक आणि नागरिकांना रोजगार मिळत असल्याचे वैभव नाईक यांनी सांगितले. आपण केलेल्या कामांची जाहिरातबाजी केली नाही, कारण मतदारसंघाचा सर्वांगीण विकास करणे ही आमदार म्हणून आपली जबाबदारी होती, असे ते म्हणाले.

आपण दहा वर्षांत काहीच काम केले नाही, असे निलेश राणे वारंवार सांगत असून, जनतेमध्ये आपल्याबाबत चुकीची प्रतिमा निर्माण करण्याचा प्रयत्न केला जात असल्याचा आरोपही नाईक यांनी केला. मात्र, आपल्या कार्यकाळात केलेली कामे आणि जनतेसाठी दिलेला वेळ याची माहिती मतदारसंघातील नागरिकांना असल्याचे त्यांनी स्पष्ट केले.