जम्मू येथे ‘लोककलेतील श्रीगणेश’ विशेष सांस्कृतिक कार्यक्रम उत्साहात

जम्मू येथे ‘लोककलेतील श्रीगणेश’ विशेष सांस्कृतिक कार्यक्रम उत्साहात

महाराष्ट्राच्या लोककला, शास्त्रीय नृत्य व गायनाचे मनोहारी सादरीकरण

जम्मू :

महाराष्ट्र शासनाच्या सांस्कृतिक कार्य विभागांतर्गत सांस्कृतिक कार्य संचालनालयाच्या वतीने ‘लोककलेतील श्रीगणेश’ या विशेष सांस्कृतिक कार्यक्रमाचे जम्मू येथे उत्साहात आयोजन करण्यात आले. पद्मश्री पद्मा सचदेव गव्हर्नमेंट कॉलेज ऑडिटोरियम, गांधीनगर, जम्मू येथे शुक्रवारी झालेल्या या कार्यक्रमाला रसिकांचा उत्स्फूर्त प्रतिसाद मिळाला.

गणेशोत्सवाला राज्य महोत्सवाचा दर्जा मिळाल्यानंतर महाराष्ट्राची समृद्ध लोककला, शास्त्रीय कला आणि सांस्कृतिक परंपरा देशाच्या विविध भागांत पोहोचविण्याच्या उपक्रमाला वेग आला आहे. त्याचाच एक भाग म्हणून जम्मू येथे या विशेष कार्यक्रमाचे आयोजन करण्यात आले.

कार्यक्रमात महाराष्ट्रातील विविध लोककलांसह शास्त्रीय नृत्य आणि गायनाचे मनोहारी सादरीकरण करण्यात आले. गणेशभक्ती, महाराष्ट्राची लोकपरंपरा आणि विविध कलाविष्कार यांचा सुरेल संगम रसिकांना अनुभवता आला. महाराष्ट्राच्या सांस्कृतिक वैभवाचे दर्शन घडविणाऱ्या या कार्यक्रमाला उपस्थितांकडून उत्स्फूर्त दाद मिळाली.

सांस्कृतिक कार्य मंत्री ॲड. आशिष शेलार यांच्या संकल्पनेतून तसेच सांस्कृतिक कार्य विभागाचे सचिव डॉ. किरण कुलकर्णी आणि संचालक प्रशांत खेडेकर यांच्या मार्गदर्शनाखाली या कार्यक्रमाचे आयोजन करण्यात आले.

या उपक्रमामुळे महाराष्ट्राच्या लोककला आणि सांस्कृतिक परंपरांना राज्याबाहेरील रसिकांपर्यंत पोहोचविण्यास मदत होत असून, गणेशोत्सवाच्या माध्यमातून महाराष्ट्राच्या सांस्कृतिक वैभवाचा व्यापक प्रसार होत आहे.