दापोली कृषी महाविद्यालयात ‘नशामुक्त भारत’ अभियानांतर्गत पोस्टर स्पर्धा उत्साहात

दापोली कृषी महाविद्यालयात ‘नशामुक्त भारत’ अभियानांतर्गत पोस्टर स्पर्धा उत्साहात

दापोली :

कृषी अभियांत्रिकी आणि तंत्रज्ञान महाविद्यालय, दापोली येथे राष्ट्रीय सेवा योजना (NSS) अंतर्गत ‘नशामुक्त भारत अभियान’ राबविण्यात आले. या अभियानांतर्गत ३० सप्टेंबर २०२६ रोजी पोस्टर बनविण्याच्या स्पर्धेचे आयोजन करण्यात आले होते. विद्यार्थ्यांनी उत्स्फूर्त सहभाग घेत ही स्पर्धा यशस्वी केली.

स्पर्धेत विद्यार्थ्यांनी नशामुक्तीशी संबंधित पाच वेगवेगळ्या विषयांवर पोस्टर तयार केले. व्यसनमुक्तीबाबत जनजागृती करण्यासोबतच समाजात सकारात्मक संदेश पोहोचविण्याचा प्रयत्न विद्यार्थ्यांनी पोस्टरच्या माध्यमातून केला.

महाविद्यालयाचे सहयोगी अधिष्ठाता डॉ. संदीपकुमार जैन यांच्या मार्गदर्शनाखाली हा कार्यक्रम पार पडला. ‘नशामुक्त भारत अभियान’चे समन्वयक डॉ. हेमंत श्रीरामे यांनी विद्यार्थ्यांना स्पर्धेचे नियम व मार्गदर्शक सूचना सांगितल्या.

यावेळी विद्यापीठ सांस्कृतिक समन्वयक डॉ. निलेश शिरसाठ, महाविद्यालयाचे सांस्कृतिक समन्वयक डॉ. मयुरेश पाटील, राष्ट्रीय सेवा योजनेचे समन्वयक डॉ. हर्षल भांगे, सहसमन्वयक प्रा. एम. एच. थारकर तसेच सहाय्यक कुलसचिव श्री. अजित जाधव यांची प्रमुख उपस्थिती होती.

महाविद्यालयातील अधिकारी, कर्मचारी आणि NSS विद्यार्थ्यांनी मोठ्या उत्साहाने सहभाग घेतल्याने पोस्टर स्पर्धा यशस्वीरीत्या पार पडली.