नवी मुंबईतील विविध प्रभागांत उपमुख्यमंत्री एकनाथ शिंदे यांचा भव्य रोड शो
नवी मुंबई l प्रतिनिधी
नवी मुंबई शहरातील विविध प्रभागांमध्ये आज उपमुख्यमंत्री एकनाथ शिंदे यांच्या भव्य रोड शोचे आयोजन करण्यात आले होते. या रोड शोला नागरिकांचा उत्स्फूर्त प्रतिसाद मिळाला असून संपूर्ण परिसरात जल्लोषाचे वातावरण निर्माण झाले होते. ठिकठिकाणी फुलांची उधळण, ढोल-ताशांचे गजर आणि घोषणांनी नवी मुंबई दुमदुमून गेली.
रोड शोदरम्यान उपमुख्यमंत्री एकनाथ शिंदे यांनी वाहनातून नागरिकांना अभिवादन केले. विविध प्रभागांत नागरिक, कार्यकर्ते, महिला, युवक मोठ्या संख्येने सहभागी झाले होते. स्थानिक पदाधिकारी, लोकप्रतिनिधी तसेच शिवसैनिकांची उपस्थिती लक्षणीय होती. नागरिकांनी हात हलवत, फलक दाखवत आणि घोषणांच्या माध्यमातून उपमुख्यमंत्र्यांचे स्वागत केले.
यावेळी एकनाथ शिंदे यांनी नवी मुंबईच्या विकासासाठी सरकार कटिबद्ध असल्याचे सांगितले. पायाभूत सुविधा, वाहतूक व्यवस्था, पाणीपुरवठा, आरोग्य व शिक्षण क्षेत्रातील विकासकामांना प्राधान्य देण्यात येत असल्याचे त्यांनी नमूद केले. नवी मुंबईला आधुनिक, सुरक्षित आणि नागरिकाभिमुख शहर बनवण्याचा सरकारचा संकल्प असल्याचे त्यांनी स्पष्ट केले.
रोड शोच्या मार्गावर विविध सामाजिक संस्था, व्यापारी संघटना आणि स्थानिक नागरिकांनी उपमुख्यमंत्र्यांची भेट घेत आपले प्रश्न व अपेक्षा मांडल्या. या समस्यांवर सकारात्मक निर्णय घेतले जातील, असे आश्वासनही त्यांनी दिले.
उपमुख्यमंत्री एकनाथ शिंदे यांच्या या भव्य रोड शोमुळे नवी मुंबईतील राजकीय वातावरण तापले असून आगामी काळात शहराच्या विकासाला अधिक गती मिळेल, असा विश्वास कार्यकर्ते आणि नागरिकांनी व्यक्त केला.