पुण्यात कर्फ्यू लागू नाही; व्हायरल दाव्यांवर पुणे पोलिसांचे स्पष्टीकरण
पुण्यात कर्फ्यू लागू नाही; व्हायरल दाव्यांवर पुणे पोलिसांचे स्पष्टीकरण
पुणे :
शहरात १४ दिवसांची संचारबंदी (कर्फ्यू) लागू करण्यात आल्याचा दावा सोशल मीडिया आणि काही माध्यमांमधून व्हायरल होत असताना पुणे पोलिसांनी हे वृत्त फेटाळून लावले आहे. पुणे शहरात कोणतीही संचारबंदी किंवा शहरव्यापी निर्बंध लागू करण्यात आलेले नसल्याचे पोलिस प्रशासनाने स्पष्ट केले आहे. काही अहवालांमध्ये २६ मेपासून पंधरा दिवसांसाठी सार्वजनिक हालचालींवर निर्बंध घालण्यात आल्याचा तसेच जमावबंदी लागू केल्याचा दावा करण्यात आला होता. मात्र, अशा प्रकारचा कोणताही आदेश जारी करण्यात आलेला नसल्याचे अधिकाऱ्यांनी सांगितले.
दरम्यान, वाढत्या इंधन दरवाढीच्या आणि पश्चिम आशियातील परिस्थितीच्या पार्श्वभूमीवर पंतप्रधान नरेंद्र मोदी यांनी इंधन बचतीचे आवाहन केल्याच्या संदर्भाने काही भ्रामक संदेश सोशल मीडियावर प्रसारित करण्यात आले होते. त्यामध्ये निदर्शने, मोर्चे आणि सार्वजनिक मेळाव्यांवर बंदी घालण्यात आल्याचा दावा करण्यात आला होता. तसेच पुणे महानगरपालिकेने कर्मचाऱ्यांसाठी कडक काटकसरीचे उपाय लागू केल्याचे, शासकीय वाहनांच्या वापरावर निर्बंध आणल्याचे, अनिवार्य कारपूलिंग आणि सार्वजनिक वाहतुकीचा वापर सक्तीचा केल्याचे दावेही व्हायरल पोस्टमध्ये करण्यात आले होते. मात्र, या दाव्यांबाबत अधिकृत पुष्टी झालेली नाही. पुणे पोलिसांनी नागरिकांना अफवांवर विश्वास न ठेवण्याचे आणि अधिकृत माहितीवरच विश्वास ठेवण्याचे आवाहन केले आहे
