मध्य रेल्वेच्या भरती परीक्षेत मराठीचा समावेश
आंदोलनानंतर निर्णयात बदल
मुंबई (प्रतिनिधी) : मध्य रेल्वेच्या भरती परीक्षेत मराठी भाषेचा पर्याय समाविष्ट करण्याचा महत्त्वपूर्ण निर्णय अखेर घेण्यात आला आहे. प्रारंभी केवळ हिंदी आणि इंग्रजी या भाषांमध्ये परीक्षा घेण्याच्या निर्णयावरून निर्माण झालेल्या वादानंतर हा बदल करण्यात आला.
१६ मार्च २०२६ रोजी जारी करण्यात आलेल्या अधिसूचनेत मराठीला स्थान देण्यात आले नव्हते. महाराष्ट्रातील भरती प्रक्रियेत स्थानिक भाषेला वगळल्याने उमेदवारांमध्ये तीव्र नाराजी व्यक्त झाली होती. या निर्णयावर विविध स्तरांतून टीका झाली.
दरम्यान, महाराष्ट्र नवनिर्माण सेनाच्या पुढाकाराने हा मुद्दा उचलण्यात आला. युवा नेते अमित ठाकरे यांनी मराठी तरुणांवर अन्याय होत असल्याचा आरोप करत आक्रमक भूमिका घेतली होती. मराठीचा समावेश न झाल्यास आंदोलन छेडण्याचा इशाराही देण्यात आला होता.
या पार्श्वभूमीवर मध्य रेल्वे प्रशासनाने १६ मार्चची अधिसूचना रद्द करत २२ एप्रिल २०२६ रोजी नव्याने अधिसूचना जारी केली. नव्या अधिसूचनेत मराठी भाषेला पर्याय म्हणून समाविष्ट करण्यात आले असून यामुळे राज्यातील उमेदवारांना मोठा दिलासा मिळाला आहे.