महाराष्ट्रासह सहा राज्यांमध्ये मतदार यादीच्या SIR प्रक्रियेला मुदतवाढ

महाराष्ट्रासह सहा राज्यांमध्ये मतदार यादीच्या SIR प्रक्रियेला मुदतवाढ

महाराष्ट्रात १३ नोव्हेंबरपर्यंत हरकती व दावे दाखल करता येणार

नवी दिल्ली :

भारत निवडणूक आयोगाने मतदार यादीच्या विशेष सखोल पुनरीक्षण (Special Intensive Revision – SIR) प्रक्रियेच्या वेळापत्रकात महत्त्वपूर्ण बदल केला आहे. महाराष्ट्रासह दिल्ली, आंध्र प्रदेश, तेलंगणा, हरियाणा आणि नागालँड या सहा राज्ये व केंद्रशासित प्रदेशांमध्ये SIR प्रक्रियेच्या विविध टप्प्यांना मुदतवाढ देण्यात आली आहे. संबंधित राज्यांच्या मुख्य निवडणूक अधिकाऱ्यांनी केलेल्या विनंतीनंतर निवडणूक आयोगाने २९ ऑक्टोबर रोजी हा निर्णय घेतला.

महाराष्ट्रातील मतदारांसाठी या निर्णयामुळे विशेष दिलासा मिळाला आहे. यापूर्वी २६ ऑक्टोबर रोजी संपलेली दावे व हरकती दाखल करण्याची मुदत आता १३ नोव्हेंबर २०२६ पर्यंत वाढविण्यात आली आहे. त्यामुळे मतदार यादीत नाव समाविष्ट करणे, नावातील त्रुटींबाबत हरकत नोंदवणे किंवा आवश्यक दुरुस्तीच्या प्रक्रियेसाठी नागरिकांना आणखी वेळ मिळणार आहे.

महाराष्ट्रात दावे व हरकतींच्या नोटीस आणि निकाली काढण्याची प्रक्रिया २५ नोव्हेंबरपर्यंत सुरू राहणार असून, अंतिम मतदार यादी ३० नोव्हेंबर २०२६ रोजी प्रसिद्ध केली जाणार आहे. यापूर्वी अंतिम यादी प्रसिद्ध करण्याची तारीखही बदलण्यात आली आहे.

दिल्लीमध्ये दावे व हरकती दाखल करण्याची मुदत ३० ऑक्टोबरऐवजी २५ नोव्हेंबरपर्यंत वाढविण्यात आली आहे. तेथील दावे व हरकती निकाली काढण्याची प्रक्रिया १५ डिसेंबरपर्यंत सुरू राहणार असून, अंतिम मतदार यादी २२ डिसेंबर रोजी प्रसिद्ध होईल.

आंध्र प्रदेश आणि हरियाणामध्ये दावे व हरकती निकाली काढण्याची प्रक्रिया २० नोव्हेंबरपर्यंत, नागालँडमध्ये २५ नोव्हेंबरपर्यंत, तर तेलंगणामध्ये २६ नोव्हेंबरपर्यंत वाढविण्यात आली आहे. या चारही राज्यांमध्ये अंतिम मतदार यादी ३० नोव्हेंबर २०२६ रोजी प्रसिद्ध केली जाणार आहे.

मतदार यादीतील नाव, नोंदणी आणि हरकती यांसंदर्भातील प्रक्रिया पूर्ण करण्यासाठी निवडणूक आयोगाने दिलेली ही मुदतवाढ महत्त्वपूर्ण मानली जात आहे. त्यामुळे संबंधित राज्यांतील पात्र मतदारांनी वाढीव मुदतीचा लाभ घेऊन मतदार यादीतील आपली नोंद तपासावी आणि आवश्यक असल्यास विहित प्रक्रियेनुसार दावे किंवा हरकती दाखल कराव्यात.