मुंबईच्या डबेवाला संघटनेसोबत महापौर रितू तावडे यांची संयुक्त सभा; विविध प्रश्नांवर सकारात्मक चर्चा

मुंबईच्या डबेवाला संघटनेसोबत महापौर रितू तावडे यांची संयुक्त सभा; विविध प्रश्नांवर सकारात्मक चर्चा

डबेवाल्यांच्या कल्याणासाठी आवश्यक सहकार्याचे आश्वासन; आमदार श्रीकांत भारतीय यांची प्रमुख उपस्थिती

मुंबई, दि. २८ : मुंबईची ओळख आणि शान मानल्या जाणाऱ्या डबेवाला संघटनेसोबत मुंबईच्या महापौर रितू तावडे यांच्या अध्यक्षतेखाली महापौर दालनात संयुक्त सभा आयोजित करण्यात आली. यावेळी आमदार श्रीकांत भारतीय प्रमुख उपस्थित होते.

मुंबईकरांना अनेक दशकांपासून वेळेवर आणि विश्वासार्ह सेवा देणाऱ्या डबेवाल्यांच्या विविध समस्या, मागण्या आणि भावी योजनांबाबत या बैठकीत सविस्तर चर्चा करण्यात आली. डबेवाला संघटनेच्या प्रतिनिधींनी आपल्या अडचणी आणि अपेक्षा मांडल्या, तर महापालिका प्रशासनाकडून त्यावर सकारात्मक भूमिका व्यक्त करण्यात आली.

महापौर रितू तावडे यांनी डबेवाल्यांचे मुंबईच्या सामाजिक आणि आर्थिक जीवनातील योगदान अधोरेखित करत त्यांच्या कल्याणासाठी आवश्यक ते सर्व सहकार्य करण्यात येईल, असे आश्वासन दिले. डबेवाल्यांच्या कामकाजास अधिक सुलभता मिळावी तसेच त्यांच्या विविध प्रश्नांचे निराकरण करण्यासाठी संबंधित विभागांशी समन्वय साधला जाईल, असेही त्यांनी सांगितले.

या बैठकीत डबेवाल्यांच्या सुविधा, सुरक्षितता, वाहतूक व्यवस्थेशी संबंधित मुद्दे तसेच भविष्यातील विकासात्मक उपक्रमांवर सकारात्मक चर्चा झाली. मुंबईकरांची अविरत सेवा करणाऱ्या डबेवाला संघटनेच्या कार्याचे उपस्थितांनी कौतुक केले.