इचलकरंजीत MH51F नोंदणी मालिकेला २९ जुलैपासून प्रारंभ
हातकणंगले व शिरोळ तालुक्यातील वाहनधारकांना संधी; एकापेक्षा अधिक अर्ज आल्यास ३० जुलै रोजी लिलाव
इचलकरंजी, दि. २८ :
नवनिर्मित उप प्रादेशिक परिवहन कार्यालय, इचलकरंजी यांच्यामार्फत नवीन चारचाकी वाहनांसाठी MH51F ही नोंदणी मालिका २९ जुलै २०२६ पासून सुरू करण्यात येत आहे. या मालिकेतील पसंतीचे नोंदणी क्रमांक मिळविण्यासाठी अर्ज स्वीकारण्याची प्रक्रिया २९ जुलै रोजी सकाळी ९.४५ ते सायंकाळी ५ वाजेपर्यंत राबविण्यात येणार आहे.
उप प्रादेशिक परिवहन कार्यालयाने दिलेल्या माहितीनुसार, पसंतीचा नोंदणी क्रमांक घेण्यासाठी अर्जदार हा हातकणंगले किंवा शिरोळ तालुक्यातील वाहनधारक असणे आवश्यक आहे. अर्जासोबत संबंधित नोंदणी क्रमांकासाठी निर्धारित मूळ रकमेचा डिमांड ड्राफ्ट (धनाकर्ष) जोडणे बंधनकारक राहणार आहे. धनादेश (Cheque) किंवा पे-ऑर्डर स्वीकारले जाणार नसून अशा प्रकारचे अर्ज बाद करण्यात येतील.
डिमांड ड्राफ्ट हा “DY REGIONAL TRANSPORT OFFICE ICHALKARANJI” या नावानेच काढलेला असावा. तसेच धनाकर्षाच्या मागील बाजूस अर्जदाराचे नाव, वाहनाचा प्रकार, मागणी केलेला नोंदणी क्रमांक आणि मोबाईल क्रमांक नमूद करणे आवश्यक आहे.