मुंबई–मडगाव वंदे भारत एक्सप्रेसच्या यशस्वी सेवेची तीन वर्षे पूर्ण
मुंबई–मडगाव वंदे भारत एक्सप्रेसच्या यशस्वी सेवेची तीन वर्षे पूर्ण
कोकण रेल्वे प्रवासाला नवी गती
मुंबई, दि. २८ :ट्रेन क्रमांक २२२२९/२२२३० मुंबई सीएसएमटी–मडगाव जंक्शन–मुंबई सीएसएमटी वंदे भारत एक्सप्रेसने आपल्या यशस्वी सेवेची तीन गौरवशाली वर्षे पूर्ण केली. या निमित्ताने रेल्वे प्रशासन आणि प्रवाशांकडून या आधुनिक रेल्वे सेवेबद्दल समाधान व्यक्त करण्यात आले.
कोकण रेल्वे मार्गावरील प्रवास अधिक वेगवान, सुरक्षित, आरामदायी आणि आधुनिक करण्यामध्ये वंदे भारत एक्सप्रेसने महत्त्वाची भूमिका बजावली आहे. अत्याधुनिक सुविधा, आरामदायी आसनव्यवस्था, उत्कृष्ट प्रवास अनुभव आणि कमी वेळेत गंतव्यस्थानी पोहोचण्याच्या सुविधेमुळे या गाडीला प्रवाशांकडून मोठा प्रतिसाद मिळत आहे.
मुंबई आणि गोवा दरम्यान प्रवास करणारे पर्यटक, व्यावसायिक, विद्यार्थी आणि इतर प्रवाशांसाठी वंदे भारत एक्सप्रेस ही पसंतीची रेल्वे सेवा ठरली आहे. कोकण रेल्वे मार्गावरील आधुनिक रेल्वे वाहतुकीच्या नव्या पर्वाचे प्रतीक म्हणून या गाडीने गेल्या तीन वर्षांत आपली वेगळी ओळख निर्माण केली आहे.
तीन वर्षांच्या यशस्वी वाटचालीनिमित्त रेल्वे प्रशासनाने या सेवेच्या पुढील प्रवासासाठी शुभेच्छा व्यक्त करत, भविष्यातही प्रवाशांना अधिक दर्जेदार, सुरक्षित आणि आधुनिक सेवा देण्याचा संकल्प व्यक्त केला.
