‘रणजीतबाबू देशमुख ग्रामविकास पुरस्कार-२०२६’ प्रदान

‘रणजीतबाबू देशमुख ग्रामविकास पुरस्कार-२०२६’ प्रदान

नागपूर, प्रतिनिधी : केंद्र व राज्य शासनाच्या विविध योजनांचा प्रभावी वापर करून लोकसहभागाच्या माध्यमातून महाराष्ट्रातील ग्रामीण भागात विकासाची नवी क्रांती घडत असल्याचे प्रतिपादन मुख्यमंत्री देवेंद्र फडणवीस (Devendra Fadnavis ) यांनी केले.

नागपूर येथील वनामती सभागृहात आयोजित कार्यक्रमात मुख्यमंत्री फडणवीस यांच्या हस्ते ‘रणजीतबाबू देशमुख ग्रामविकास पुरस्कार-२०२६’ प्रदान करण्यात आले.रणजीतबाबू देशमुख (Ranjitbabu Deshmukh Foundation) यांच्या वतीने माजी ग्रामीण विकास मंत्री रणजीत देशमुख (Ranjit Deshmukh) यांच्या ८० व्या वाढदिवसानिमित्त या पुरस्कार सोहळ्याचे आयोजन करण्यात आले होते.

यावेळी महसूल मंत्री चंद्रशेखर बावनकुळे (Chandrashekhar Bawankule), ग्रामीण विकास व पंचायतराज मंत्री, जयकुमार गोरे (Jaikumar Gore), आमदार डॉ. आशिष देशमुख (Dr. Ashish Deshmukh), माजी मंत्री अनिल देशमुख (Anil Deshmukh) यांच्यासह विविध मान्यवर उपस्थित होते.0

मुख्यमंत्री फडणवीस म्हणाले की, राज्य शासनाने ग्रामविकासाच्या विविध संकल्पनांद्वारे ग्रामीण भागात दर्जेदार सुविधा आणि सेवा उपलब्ध करून दिल्या आहेत. स्थानिक स्वराज्य संस्थांनी शासनाच्या योजनांचा प्रभावी वापर करत लोकसहभागाच्या माध्यमातून गावांच्या विकासाला गती दिली आहे. लोकसहभाग हाच ग्रामविकासाचा खरा मूलमंत्र असून त्यातूनच शाश्वत विकास शक्य झाला आहे.

ते पुढे म्हणाले की, राज्यातील महत्त्वाकांक्षी ‘जलयुक्त शिवार योजना’ (Jalyukt Shivar Yojana ) लोकसहभागामुळे यशस्वी ठरली असून अनेक गावे पाणीदार झाली आहेत. ग्रामीण विकास क्षेत्रात उल्लेखनीय कामगिरी करणाऱ्या ग्रामपंचायती आणि संस्थांचा सन्मान करून त्यांना प्रोत्साहन देण्याचे महत्त्वपूर्ण कार्य या पुरस्कार सोहळ्याच्या माध्यमातून होत आहे.

केंद्र व राज्य शासनाच्या योजनांचा प्रभावी लाभ घेत आपल्या गावांचा सर्वांगीण विकास साधणाऱ्या ग्रामपंचायती व संस्थांचे मुख्यमंत्री फडणवीस यांनी विशेष कौतुक केले. महाराष्ट्र शासन ग्रामीण विकासाच्या ध्येयपूर्तीसाठी कटिबद्ध असून अशा उपक्रमांमुळे ग्रामीण भागातील विकासाला अधिक चालना मिळेल, असा विश्वास त्यांनी व्यक्त केला.