रामकृष्ण मोरे नाट्यगृहातील कलाकारांच्या सुविधांचा प्रश्न ऐरणीवर

मेकअप रूममध्ये एसी नसल्याने संताप

पिंपरी-चिंचवड

शहराच्या सांस्कृतिक वैभवाचे प्रतीक मानल्या जाणाऱ्या पिंपरी-चिंचवडमधील रामकृष्ण मोरे नाट्यगृहात कलाकारांना मूलभूत सुविधा न मिळाल्याने नाराजी व्यक्त होत आहे. नाट्यगृहातील मेकअप रूममध्ये वातानुकूलन (एसी) सुविधा नसल्यामुळे कलाकारांना प्रचंड उकाड्यात तासन्तास तयारी करावी लागत असून, याबाबत प्रशासनाच्या उदासीन भूमिकेवर प्रश्नचिन्ह उपस्थित करण्यात येत आहे.

कलाकारांच्या म्हणण्यानुसार, गेल्या तीन ते चार वर्षांपासून मेकअप रूममध्ये एसी बसवण्याचे आश्वासन दिले जात आहे. मात्र “टेंडर मंजूर झालेले नाही”, “प्रक्रिया सुरू आहे” किंवा “चर्चा सुरू आहे” अशी कारणे देत हा विषय सतत पुढे ढकलला जात असल्याचा आरोप करण्यात आला आहे.

विशेष म्हणजे नाट्यगृहातील व्हीआयपी कक्षांमध्ये वातानुकूलन यंत्रणा नियमितपणे कार्यरत असताना कलाकारांसाठी असलेल्या मेकअप रूममध्ये ही सुविधा उपलब्ध नसल्याने संताप व्यक्त केला जात आहे. रंगमंचावर उत्कृष्ट सादरीकरण करणाऱ्या कलाकारांच्या मूलभूत गरजांकडे दुर्लक्ष होत असल्याची भावना यामुळे निर्माण झाली आहे.

कलाकारांनी हा प्रश्न केवळ सुविधेचा नसून आरोग्य, कामाचा दर्जा आणि सन्मानाशी निगडित असल्याचे सांगितले आहे. उकाड्यात मेकअप करणे, पोशाख परिधान करून दीर्घकाळ थांबणे यामुळे आरोग्यावर परिणाम होत असल्याचीही तक्रार करण्यात आली आहे.

नाट्यगृह प्रशासन आणि संबंधित अधिकाऱ्यांनी याबाबत तातडीने ठोस निर्णय घेऊन मेकअप रूममध्ये एसी बसविण्यासाठी स्पष्ट वेळापत्रक जाहीर करावे, टेंडर प्रक्रिया पूर्ण करावी आणि कलाकारांना सुसज्ज व सन्मानजनक वातावरण उपलब्ध करून द्यावे, अशी मागणी होत आहे.

सांस्कृतिक क्षेत्राला प्रोत्साहन देण्याच्या घोषणा केल्या जात असताना प्रत्यक्षात कलाकारांच्या मूलभूत सुविधांकडे दुर्लक्ष होणे ही चिंतेची बाब असल्याचे मतही व्यक्त केले जात आहे.