शिकारीला गेले अन् काळाचा घाला!

शिकारीला गेले अन् काळाचा घाला!

दाभोळजवळ गावठी बंदुकीचा मिसफायर; एकाचा जागीच मृत्यू, एक जखमी

दापोली | प्रतिनिधी : अरविंद मांडवकर

दापोली तालुक्यातील दाभोळ परिसरातील खोंडारण-खालचीवाडी येथे शिकारीसाठी गेलेल्या दोघांना गावठी बंदुकीतून सुटलेल्या छऱ्यांच्या गोळ्या लागल्याची धक्कादायक घटना ३० सप्टेंबरच्या मध्यरात्री घडली. या घटनेत सचिन शांताराम शिगवण (४४) यांचा जागीच मृत्यू झाला, तर सुनील पान्दे (४८) हे गंभीर जखमी झाले आहेत.

मिळालेल्या प्राथमिक माहितीनुसार, ३० सप्टेंबर रोजी रात्री सुमारे १२ ते १ वाजण्याच्या सुमारास दोघेही शिकारीसाठी रानात गेले होते. यावेळी गावठी बंदुकीचा मिसफायर झाल्याने बंदुकीतून सुटलेले छरे दोघांना लागल्याची प्राथमिक माहिती दाभोळ पोलिसांकडून देण्यात आली आहे.

सचिन शिगवण यांच्या पोटात चार ते पाच छरे लागल्याने त्यांचा जागीच मृत्यू झाल्याचे सांगण्यात येत आहे. तर सुनील पान्दे यांच्या गुडघ्यात आणि मांडीच्या भागात दोन ते तीन छरे लागले. त्यांना उपचारासाठी दापोली उपजिल्हा रुग्णालयात दाखल करण्यात आले असून त्यांच्यावर उपचार सुरू आहेत.

घटनेची माहिती मिळताच दाभोळ पोलिसांनी घटनास्थळी धाव घेत पंचनामा केला. पोलिसांनी संबंधित गावठी बंदूक ताब्यात घेतली असून गोळी नेमक्या कोणत्या परिस्थितीत सुटली, बंदुकीची हाताळणी कोणाकडून झाली आणि घटनेच्या वेळी दोघांची नेमकी स्थिती काय होती, याचा तपास सुरू आहे.

या घटनेमुळे दाभोळ परिसरात खळबळ उडाली असून पोलिस तपासातून घटनेमागील नेमके कारण स्पष्ट होणार आहे.