सिंधुदुर्गच्या विकासाला नवी गती; पालकमंत्री नितेश राणे यांच्या विविध उपक्रमांची राज्यभर चर्चा
सिंधुदुर्गच्या विकासाला नवी गती; पालकमंत्री नितेश राणे यांच्या विविध उपक्रमांची राज्यभर चर्चा
सिंधुदुर्ग, दि. १५ : राज्याचे मत्स्यव्यवसाय व बंदरे मंत्री तथा सिंधुदुर्ग जिल्ह्याचे पालकमंत्री नितेश राणे यांच्या नेतृत्वाखाली जिल्ह्यात विविध विकासकामांना गती मिळाल्याची चर्चा सध्या सुरू आहे. मत्स्यव्यवसाय, बंदर विकास, किनारी पर्यटन आणि पायाभूत सुविधांच्या क्षेत्रात राबविण्यात येत असलेल्या उपक्रमांमुळे सिंधुदुर्गच्या विकासाला नवे आयाम प्राप्त होत असल्याचे समर्थकांकडून सांगितले जात आहे.
पालकमंत्री म्हणून कार्यभार स्वीकारल्यानंतर नितेश राणे यांनी जिल्ह्यातील विविध विकासकामांचा नियमित आढावा घेत प्रशासनाला गती देण्यावर भर दिला आहे. त्यामुळे अनेक रखडलेल्या प्रकल्पांना चालना मिळाल्याचे चित्र दिसून येत आहे. मत्स्यव्यवसाय आणि बंदर विकास क्षेत्रासाठी निधी उपलब्ध करून देण्याबरोबरच किनारी भागातील पर्यटनवृद्धीसाठीही विविध योजना राबविण्यात येत आहेत.
पर्यटन क्षेत्राला नवे बळ
सिंधुदुर्गच्या पर्यटन विकासाच्या दृष्टीने भारतीय नौदलाची माजी युद्धनौका ‘आयएनएस गुलदार’ निवती किनाऱ्याजवळ समुद्रतळावर स्थापित करून ‘अंडरवॉटर म्युझियम’ विकसित करण्याचा महत्त्वाकांक्षी प्रकल्प चर्चेत आहे. हा प्रकल्प पूर्ण झाल्यानंतर देश-विदेशातील पर्यटकांसाठी सिंधुदुर्ग हे एक आकर्षक पर्यटन केंद्र ठरेल, अशी अपेक्षा व्यक्त केली जात आहे.
मुंबई-विजयदुर्ग बोटसेवेमुळे दिलासा
कोकणातील जलवाहतूक अधिक सक्षम करण्यासाठी मुंबई ते विजयदुर्ग प्रवासी बोटसेवा सुरू करण्यात आली आहे. या सेवेमुळे कोकणवासीयांना तसेच पर्यटकांना जलमार्गाचा पर्याय उपलब्ध झाला असून मुंबई-गोवा महामार्गावरील वाहतुकीवरील ताण कमी होण्यास मदत होणार आहे.
मत्स्य व बंदर विभागाच्या कामाची दखल
मत्स्यव्यवसाय आणि बंदर विभागामार्फत राबविण्यात येणाऱ्या विविध योजनांची दखल राज्य शासन स्तरावर घेतली जात असून विभागाच्या कामकाजाबाबत मुख्यमंत्री देवेंद्र फडणवीस यांनीही समाधान व्यक्त केल्याची माहिती समर्थकांनी दिली.
जिल्ह्याच्या पर्यटन, मत्स्यव्यवसाय, जलवाहतूक आणि पायाभूत सुविधांच्या विकासासाठी सुरू असलेल्या विविध प्रकल्पांमुळे सिंधुदुर्गच्या विकासाला वेग मिळत असल्याचे चित्र दिसत आहे.
