सिंधुदुर्गात १ ते १० ऑक्टोबरदरम्यान जलसंधारणाची विशेष मोहीम; १० हजार वनराई बंधाऱ्यांचे उद्दिष्ट

सिंधुदुर्गात १ ते १० ऑक्टोबरदरम्यान जलसंधारणाची विशेष मोहीम; १० हजार वनराई बंधाऱ्यांचे उद्दिष्ट

सिंधुदुर्ग :

जिल्ह्यात जलसंधारणाच्या कामांना गती देण्यासाठी १ ते १० ऑक्टोबर २०२६ या कालावधीत जलतारा आणि वनराई बंधारे उभारणीची विशेष मोहीम राबविण्यात येणार आहे. या अभियानाच्या माध्यमातून गावपातळीवर जलसंधारणाची कामे व्यापक स्वरूपात हाती घेण्यात येणार आहेत.

या विशेष अभियानांतर्गत जिल्ह्यातील सर्व ४३३ ग्रामपंचायतींसाठी पालकमित्र म्हणून प्रत्येकी एका अधिकाऱ्याची नियुक्ती करण्यात आली आहे. संबंधित अधिकारी आपल्या कार्यक्षेत्रातील ग्रामपंचायतीमध्ये जलसंधारणाच्या कामांना चालना देण्यासाठी समन्वयाचे काम करणार आहेत.

प्रत्येक ग्रामपंचायतीमध्ये २५ जलतारा उभारण्याचे उद्दिष्ट ठेवण्यात आले असून, त्याचबरोबर संपूर्ण सिंधुदुर्ग जिल्ह्यात १० हजार वनराई बंधारे उभारण्याचे नियोजन करण्यात आले आहे.

पावसाचे पाणी अडवणे, त्याचा योग्य वापर करणे आणि भविष्यातील पाणीटंचाईच्या परिस्थितीला सामोरे जाण्यासाठी जलसंधारणाच्या उपाययोजना अधिक प्रभावीपणे राबविणे, हा या विशेष मोहिमेचा उद्देश आहे. गावागावांत नागरिक, ग्रामपंचायत आणि प्रशासनाच्या समन्वयातून ही कामे करण्यावर भर दिला जाणार आहे.

या मोहिमेत जिल्ह्यातील सर्व ग्रामपंचायतींचा सहभाग राहणार असून, पालकमित्र अधिकाऱ्यांच्या माध्यमातून जलसंधारणाच्या कामांचा पाठपुरावा आणि समन्वय केला जाणार आहे.