२१ व्या महाराष्ट्र राज्य पोलीस कर्तव्य मेळावा-२०२६ चा उत्साहात समारोप

२१ व्या महाराष्ट्र राज्य पोलीस कर्तव्य मेळावा-२०२६ चा उत्साहात समारोप

पोलीस महासंचालक सदानंद दाते यांच्या प्रमुख उपस्थितीत सोहळा; २६ संघांचे शिस्तबद्ध संचलन, उत्कृष्ट कामगिरी करणाऱ्या संघांना फिरते चषक प्रदान

पुणे प्रतिनिधी :

२१ व्या महाराष्ट्र राज्य पोलीस कर्तव्य मेळावा-२०२६ चा समारोप समारंभ १० ऑक्टोबर २०२६ रोजी सायंकाळी राज्य राखीव पोलीस बल, गट क्रमांक २, पुणे येथील परेड ग्राऊंडवर उत्साहात पार पडला. महाराष्ट्र राज्याचे पोलीस महासंचालक श्री. सदानंद दाते यांच्या प्रमुख उपस्थितीत हा समारंभ संपन्न झाला.

बँड पथकाची मानवंदना; मान्यवरांचे स्वागत

समारंभाच्या प्रारंभी बँड पथकाने प्रमुख पाहुण्यांना मानवंदना दिली. अपर पोलीस महासंचालक, गुन्हे अन्वेषण विभाग, पुणे, श्री. सुनील रामानंद यांनी पुष्पगुच्छ देऊन पोलीस महासंचालक सदानंद दाते यांचे स्वागत केले.

२६ संघांचे शिस्तबद्ध संचलन

या मेळाव्यात सहभागी झालेल्या २६ संघांनी शिस्तबद्ध संचलनाद्वारे प्रमुख पाहुण्यांना मानवंदना दिली. यावेळी मेळाव्याची तसेच विविध स्पर्धांची माहिती सादर करण्यात आली.

उत्कृष्ट कामगिरी करणाऱ्या संघांना गौरव

मेळाव्यातील विविध स्पर्धांमध्ये उत्कृष्ट कामगिरी करणाऱ्या संघांना पोलीस महासंचालक सदानंद दाते यांच्या हस्ते फिरते चषक प्रदान करण्यात आले. शिस्त, कौशल्य आणि कर्तव्यनिष्ठेचे दर्शन घडविणाऱ्या या सोहळ्याने २१ व्या महाराष्ट्र राज्य पोलीस कर्तव्य मेळावा-२०२६ ची सांगता झाली.