Breaking : गोव्यातील एका रेस्टॉरंटला लागलेल्या आगीत 23 जणांचा मृत्यू
गोव्यातील एका रेस्टॉरंटला लागलेल्या आगीत 23 जणांचा मृत्यू झाल्याची धक्कादायक माहिती समोर आली आहे. गोव्याचे मुख्यमंत्री प्रमोड सावंत यांनी घटनास्थळी भेट देऊन परिस्थितीचा आढावा घेतला असून या प्रकरणात दोषींवर कठोर कारवाई केली जाईल, असे त्यांनी स्पष्ट केले आहे.
अत्यंत भीषण अशा या दुर्घटनेत 23 जणांचा बळी गेला असून, आग लागल्यानंतर अनेक अग्निशमन दलाच्या गाड्या तात्काळ घटनास्थळी पाठवण्यात आल्या. जवळपास दोन तासांच्या जोरदार अथक प्रयत्नांनंतर ही आग नियंत्रणात आणण्यात आली. प्राथमिक तपासातून समोर आलेली माहिती महत्त्वाची आहे—रेस्टॉरंटमध्ये रात्रीची नियमित साफसफाई व बंद करण्याची कामे सुरू असताना गॅस सिलिंडर गळती झाल्याची शक्यता व्यक्त केली जात आहे. त्यातूनच भीषण स्फोट झाला असल्याचा अंदाज आहे.
दरम्यान, पोलीस महासंचालकांनी (DGP) सांगितले की रेस्टॉरंटच्या सुरक्षाविषयक उपाययोजनांची देखील तपासणी केली जाईल. सध्या क्लब सील करण्यात आला आहे आणि मालक व व्यवस्थापनातील अधिकाऱ्यांची चौकशी सुरू आहे. स्फोटानंतर निर्माण झालेल्या दाट धुरामुळे व श्वास गुदमरल्याने अनेकांचा मृत्यू झाला असल्याचे स्पष्ट झाले आहे.
आमचे सहकारी जिंद्रा यांनी घटनास्थळाहून दिलेल्या माहितीनुसार—ही घटना रात्री सुमारे १ वाजता घडली. अर्पोरा, पणजीजवळील ‘बर्च’ नावाच्या रेस्टॉरंटमध्ये ही दुर्घटना घडली. स्वयंपाकघरात ठेवलेल्या एका गॅस सिलिंडरचा स्फोट झाला आणि त्याठिकाणी ठेवलेले केमिकल्स व फटाके यांनी आग क्षणात भयावह रूप धारण केले. काही क्षणात संपूर्ण परिसर ज्वाळांनी वेढला गेला आणि अनेकांना बाहेर पडण्याची संधीच मिळाली नाही.
दुर्घटनेत मृत्यू पावलेल्या 23 पैकी 19 जण हे रेस्टॉरंटचे कर्मचारी होते, तर 4 जण पर्यटक होते. बहुतेकांचा मृत्यू श्वास गुदमरल्यामुळे झाला असून काही जण जळूनही मृत्यूमुखी पडले आहेत. याशिवाय सुमारे 50 जण जखमी झाले असून त्यांना गोवा मेडिकल कॉलेजमध्ये हलवण्यात आले आहे, त्यापैकी काहींची प्रकृती गंभीर आहे.
गोवा पोलिसांनी या घटनेची सखोल चौकशी सुरू केली आहे आणि मुख्यमंत्री प्रमोड सावंत यांनी स्पष्ट केले आहे की या रेस्टॉरंटला परवानगी देताना आवश्यक सुरक्षा उपाय तपासले नाहीत अशा सरकारी अधिकाऱ्यांवरही कारवाई केली जाईल.