कोकण रेल्वेची तिकीटविरहित प्रवाशांवर कारवाई; एप्रिलमध्ये ₹२.७० कोटी दंड वसूल

कोकण रेल्वेची तिकीटविरहित प्रवाशांवर कारवाई; एप्रिलमध्ये ₹२.७० कोटी दंड वसूल

रत्नागिरी, प्रतिनिधी :

कोकण रेल्वे ( Konkan Railway Corporation Limited) ने तिकीटविरहित आणि अनधिकृत प्रवास करणाऱ्या प्रवाशांविरोधातील विशेष तपासणी मोहिमेत एप्रिल २०२६ महिन्यात मोठी कारवाई केली आहे. या कालावधीत तब्बल ३७ हजार प्रवाशांकडून सुमारे ₹२.७० कोटींचा दंड वसूल करण्यात आला आहे.

कोकण रेल्वे प्रशासनाने दिलेल्या माहितीनुसार, तिकीट न घेता किंवा अनधिकृतपणे प्रवास करणाऱ्या प्रवाशांवर नियमितपणे विशेष तपासणी मोहीम राबविण्यात येत आहे. त्याअंतर्गत एप्रिल महिन्यात विविध रेल्वे स्थानके आणि गाड्यांमध्ये तपासणी करण्यात आली.

मागील आर्थिक वर्ष २०२५-२६ मध्येही कोकण रेल्वेने मोठ्या प्रमाणावर कारवाई करत एकूण ४ लाख ९९ हजार ६७५ तिकीटविरहित अथवा अनधिकृत प्रवाशांकडून ₹२७.६८ कोटींचा दंड वसूल केला आहे. या आकडेवारीवरून तिकीट न घेता प्रवास करणाऱ्यांची संख्या लक्षणीय असल्याचे दिसून येते.

रेल्वे प्रशासनाने प्रवाशांना नियमांचे पालन करण्याचे आवाहन केले असून, प्रवास करण्यापूर्वी वैध तिकीट घेणे बंधनकारक असल्याचे स्पष्ट केले आहे. तिकीटविरहित प्रवास आढळल्यास दंडात्मक कारवाई करण्यात येणार असल्याचा इशाराही प्रशासनाने दिला आहे.

प्रवाशांनी रेल्वेच्या ऑनलाइन अथवा ऑफलाइन सुविधांचा वापर करून तिकीट काढावे आणि सुरक्षित व नियमबद्ध प्रवास करावा, असे आवाहन कोकण रेल्वेकडून करण्यात आले आहे.