चार जिल्ह्यांतील ट्रॉमा केअर युनिटमधील कंत्राटी आरोग्य कर्मचाऱ्यांच्या वेतनाचा प्रश्न गंभीर; राजू मसूरकरांनी मंत्रालयात धाव

 दैनिक सिंधुदुर्ग समाचार | विशेष वृत्त

सावंतवाडी/कोल्हापूर : सिंधुदुर्ग, कोल्हापूर, रत्नागिरी आणि सांगली जिल्ह्यांतील ट्रॉमा केअर युनिटमध्ये कार्यरत असलेल्या कंत्राटी आरोग्य कर्मचाऱ्यांवर उपासमारीची वेळ आली असून एप्रिल २०२६ पासून त्यांचे वेतन थांबले आहे. नवीन निविदा प्रक्रिया रखडल्यामुळे शेकडो कर्मचाऱ्यांचे आर्थिक हाल सुरू झाले असून या गंभीर प्रश्नामुळे आरोग्य सेवांवरही परिणाम होण्याची शक्यता निर्माण झाली आहे.

सध्या हे कर्मचारी केवळ नऊ हजार रुपये मासिक मानधनावर काम करत आहेत. रुग्णांची देखभाल, व्हीलचेअरवरून ने-आण, डायपर बदलणे, वॉर्ड स्वच्छता आणि अन्य अत्यावश्यक सेवा देत असतानाही त्यांना अत्यल्प वेतन मिळत असल्याची खंत कर्मचाऱ्यांनी व्यक्त केली आहे. त्यातच गेल्या काही महिन्यांपासून वेतन न मिळाल्याने अनेकांचे कुटुंबीय आर्थिक संकटात सापडले आहेत.

या परिस्थितीची माहिती मिळताच जीवन रक्षा वैद्यकीय प्रतिष्ठानचे अध्यक्ष राजू मसूरकर यांनी तातडीने आरोग्य विभागाच्या अधिकाऱ्यांशी संपर्क साधला. चौकशीत मंत्रालय स्तरावर नवीन निविदा प्रक्रिया सुरू न झाल्यामुळे हा प्रश्न निर्माण झाल्याचे स्पष्ट झाले.

यानंतर मसूरकर यांनी थेट मंत्रालयात जाऊन संबंधित अधिकाऱ्यांची भेट घेतली. रुग्णसेवेत महत्त्वाची भूमिका बजावणाऱ्या कर्मचाऱ्यांना वेळेवर वेतन न मिळणे ही गंभीर बाब असल्याचे त्यांनी अधिकाऱ्यांच्या निदर्शनास आणून दिले. तसेच निविदा प्रक्रिया तातडीने पूर्ण करून कर्मचाऱ्यांचे थकीत वेतन अदा करण्याची मागणी केली.

मंत्रालयातील अधिकाऱ्यांनी या प्रकरणाची गंभीर दखल घेत लवकरच निविदा प्रक्रिया पूर्ण करून प्रश्न मार्गी लावण्याचे आश्वासन दिल्याची माहिती मिळाली आहे. आता या आश्वासनाची प्रत्यक्ष अंमलबजावणी कधी होते, याकडे चारही जिल्ह्यांतील कर्मचाऱ्यांचे लक्ष लागले आहे.