IAS अधिकाऱ्यावरही होऊ शकते कारवाई ! बीडचे तत्कालीन जिल्हाधिकारी अविनाश पाठक निलंबित
मुंबई/बीड, प्रतिनिधी : भारतीय प्रशासकीय सेवेतील (IAS) अधिकारी असला तरी कायद्यापेक्षा कोणीही मोठा नसल्याचे पुन्हा एकदा अधोरेखित झाले आहे. बीडचे तत्कालीन जिल्हाधिकारी अविनाश पाठक यांना शासनाने निलंबित केल्याचा आदेश समोर आला असून त्याची प्रशासकीय वर्तुळात चर्चा सुरू आहे.
उपलब्ध शासकीय पत्रानुसार, तत्कालीन जिल्हाधिकारी अविनाश पाठक यांच्याविरोधात गुन्हा दाखल झाल्यानंतर शासनाने त्यांना अटकेच्या तारखेपासून निलंबित करण्याचा निर्णय घेतला आहे. विभागीय आयुक्त कार्यालय, छत्रपती संभाजीनगर येथून संबंधित पत्र जारी करण्यात आले आहे.
या प्रकरणामुळे प्रशासकीय सेवेत कार्यरत असलेल्या अधिकाऱ्यांनाही सेवा नियम आणि कायद्याचे पालन बंधनकारक असल्याची बाब पुन्हा अधोरेखित झाली आहे. कोणताही अधिकारी, मंत्री, आमदार किंवा खासदार हा लोकसेवक असून सार्वजनिक पदासोबत उत्तरदायित्वही येते, अशी प्रतिक्रिया विविध स्तरांतून व्यक्त होत आहे.
दरम्यान, निलंबन ही प्राथमिक प्रशासकीय कारवाई असून पुढील चौकशी आणि न्यायालयीन प्रक्रियेनंतरच प्रकरणाचा अंतिम निकाल स्पष्ट होणार आहे.