मध्य रेल्वेच्या AC लोकलला प्रवाशांची पसंती; दररोज ५६ लाखांचे उत्पन्न
मध्य रेल्वेच्या AC लोकलला प्रवाशांची पसंती; दररोज ५६ लाखांचे उत्पन्न
मुंबई, प्रतिनिधी : मुंबईतील वाढत्या उकाड्याच्या पार्श्वभूमीवर मध्य रेल्वेच्या वातानुकूलित (AC) लोकल गाड्यांना प्रवाशांची मोठी पसंती मिळत आहे. आरामदायी, थंडगार आणि जलद प्रवासाचा अनुभव देणाऱ्या या सेवेमुळे मध्य रेल्वेला दररोज सरासरी ५६ लाख रुपयांचे उत्पन्न मिळत असल्याची माहिती समोर आली आहे.
सध्या मध्य रेल्वे मार्गावर वातानुकूलित लोकलच्या १०८ फेऱ्या सुरू असून दररोज सुमारे १ लाख ३० हजार प्रवासी या सेवेचा लाभ घेत आहेत. वाढत्या गर्दीच्या काळातही AC लोकल प्रवाशांना आरामदायी प्रवासाचा पर्याय उपलब्ध करून देत असल्याने या सेवेची लोकप्रियता दिवसेंदिवस वाढत आहे.
मध्य रेल्वेच्या वातानुकूलित लोकल सेवांची प्रगती सातत्याने लक्षणीय ठरत असून उपनगरीय रेल्वे जाळ्यावर या गाड्यांच्या फेऱ्यांमध्ये वाढ करण्यात आली आहे. त्याचबरोबर प्रवाशांची संख्या आणि उत्पन्नातही सातत्याने वाढ होत आहे.
प्रवाशांचा या सेवेवरील विश्वास अधिक दृढ होत असून भविष्यात AC लोकल सेवांचा विस्तार करण्याच्या दृष्टीने रेल्वे प्रशासन सकारात्मक असल्याचे सांगितले जात आहे. मुंबईकरांच्या दैनंदिन प्रवासात AC लोकल हा आता केवळ पर्याय नसून आरामदायी प्रवासाची गरज बनत चालल्याचे चित्र दिसून येत आहे.
