ऑगस्टमध्ये जीएसटी संकलन ₹१.९९ लाख कोटींवर; वार्षिक आधारावर १४.८ टक्क्यांची वाढ

ऑगस्टमध्ये जीएसटी संकलन ₹१.९९ लाख कोटींवर; वार्षिक आधारावर १४.८ टक्क्यांची वाढ

महाराष्ट्राचे जीएसटी संकलन ₹२८,७७९ कोटी; आयातीशी संबंधित जीएसटीमध्ये २९ टक्क्यांची वाढ

नवी दिल्ली :

भारताचे ऑगस्ट २०२६ मधील एकूण वस्तू आणि सेवा कर (GST) संकलन ₹१,९९,८५३ कोटींवर पोहोचले आहे. गेल्या वर्षीच्या ऑगस्ट महिन्याच्या तुलनेत यंदाच्या जीएसटी संकलनात १४.८ टक्क्यांची वाढ झाली आहे. देशाच्या कर महसुलातील वाढीबरोबरच आर्थिक व्यवहारांमध्येही सकारात्मक हालचाल असल्याचे या आकडेवारीवरून दिसून येते.

ऑगस्टमधील एकूण संकलनातून परतावे वजा केल्यानंतर निव्वळ जीएसटी महसूल ₹१,६८,०५७ कोटी राहिला. मागील वर्षाच्या तुलनेत निव्वळ महसुलात ८.३ टक्क्यांची वाढ झाली आहे. दरम्यान, या कालावधीत एकूण ₹३१,७९५ कोटींचे जीएसटी परतावे देण्यात आले असून, मागील वर्षाच्या तुलनेत परताव्याच्या रकमेत तब्बल ६७.९ टक्क्यांची वाढ झाली आहे.

महाराष्ट्राचे संकलन सर्वाधिक

राज्यनिहाय जीएसटी संकलनाचा विचार करता महाराष्ट्राने ₹२८,७७९ कोटींचे संकलन करत देशातील आघाडी कायम ठेवली आहे. त्यानंतर कर्नाटक ₹१४,१४८ कोटी, गुजरात ₹१२,०४७ कोटी, तामिळनाडू ₹१०,१८९ कोटी आणि हरियाणा ₹१०,१८४ कोटी अशी अनुक्रमे प्रमुख राज्यांची कामगिरी राहिली.

शीर्ष पाच राज्यांचे जीएसटी संकलन :

आयातीशी संबंधित जीएसटीमध्ये मोठी वाढ

ऑगस्ट २०२६ मध्ये आयातीशी संबंधित जीएसटी संकलनात २९ टक्क्यांची वाढ झाली असून ते ₹६२,६०४ कोटींवर पोहोचले. दुसरीकडे, देशांतर्गत व्यवहारांमधून होणाऱ्या जीएसटी संकलनात तुलनेने मंद वाढ नोंदविण्यात आली.

ऑगस्ट २०२६ मधील एकूण जीएसटी संकलनात केंद्रीय जीएसटी (CGST) ₹३८,४१३ कोटी, राज्य जीएसटी (SGST) ₹४६,३१६ कोटी, तर देशांतर्गत व्यवहारांमधून मिळालेला एकात्मिक जीएसटी (IGST) ₹५२,५२० कोटी आहे.

एकूणच, ऑगस्ट महिन्यातील जवळपास ₹२ लाख कोटींचे जीएसटी संकलन हे देशाच्या कर महसुलाच्या दृष्टीने महत्त्वाचे ठरले आहे. महाराष्ट्राने राज्यांमध्ये सर्वाधिक जीएसटी संकलन करत आपले आघाडीचे स्थान कायम राखले आहे.