📰 केंद्र गिम्हवणे येथे केंद्रस्तरीय शिक्षण परिषद उत्साहात संपन्न
केंद्र गिम्हवणे येथे केंद्रस्तरीय शिक्षण परिषद उत्साहात संपन्न
HPV लसीकरणाबाबत शिक्षकांच्या शंकांचे निरसन; मुलींच्या आरोग्याच्या दृष्टीने लसीकरणाचे महत्त्व अधोरेखित
दापोली प्रतिनिधी : अरविंद मांडवकर
दापोली :
केंद्र गिम्हवणे अंतर्गत येणाऱ्या खाजगी शाळांमधील शिक्षकांसाठी केंद्रस्तरीय शिक्षण परिषद क्र. १ चे आयोजन UK पब्लिक स्कूल, दापोली येथे बुधवार, दि. २ सप्टेंबर २०२६ रोजी करण्यात आले. सकाळी ११ ते सायंकाळी ४ या वेळेत झालेल्या या परिषदेला मराठी व इंग्रजी माध्यमांच्या शाळांतील इयत्ता १ ली ते ७ वीला अध्यापन करणाऱ्या शिक्षकांपैकी ५० टक्के शिक्षक, इयत्ता ८ वीच्या ५० टक्के वर्गशिक्षक तसेच मराठी, इंग्रजी व उर्दू माध्यमांच्या शाळांचे मुख्याध्यापक उपस्थित होते.
परिषदेत ‘शिस्त आणि नेतृत्व गुणांचा विकास करून सकारात्मक वर्गरचना सक्षम करणे’ या विषयावर UA दळवी इंग्लिश मीडियम स्कूल, दापोलीच्या मुख्याध्यापिका श्रीमती मारिया. एम. रखांगे यांनी मार्गदर्शन केले. विद्यार्थ्यांमध्ये शिस्त, नेतृत्वगुण आणि सकारात्मक विचारसरणी विकसित करण्यासाठी शिक्षकांची भूमिका त्यांनी विविध उदाहरणांद्वारे स्पष्ट केली.
‘पाठ्यपुस्तकातील बदल’ या विषयावर मा . श्री. श्रीकांत बापट, विस्तार अधिकारी (शिक्षण) तथा इतिहास समिती सदस्य, महाराष्ट्र राज्य पाठ्यपुस्तक निर्मिती व अभ्यासक्रम संशोधन सदस्य, पाठ्यपुस्तक मंडळ, पुणे यांनी अत्यंत सुलभ आणि प्रभावी पद्धतीने मार्गदर्शन केले.
राष्ट्रीय शैक्षणिक धोरण (NEP) नुसार पाठ्यपुस्तकांमध्ये झालेले बदल, अध्ययन निष्पत्ती आणि ‘पंच अंग’ यांची त्यांनी सविस्तर माहिती दिली. केवळ सैद्धांतिक माहिती न देता दैनंदिन अध्यापनातील विविध उदाहरणांच्या माध्यमातून या संकल्पना शिक्षकांना सहज समजतील अशा पद्धतीने त्यांनी स्पष्ट केल्या. विद्यार्थ्यांच्या केवळ पाठांतरापेक्षा आकलन, कौशल्य, विचारक्षमता आणि प्रत्यक्ष कृतीवर आधारित अध्ययनाला असलेले महत्त्व त्यांनी उदाहरणांसह अधोरेखित केले. त्यामुळे बदललेल्या अभ्यासक्रमाची तसेच पाठ्यपुस्तकांच्या प्रभावी वापराची दिशा शिक्षकांना स्पष्ट झाली.
शाळा व्यवस्थापन समितीच्या भूमिकेवर मार्गदर्शन
‘शाळा व्यवस्थापन समिती मार्गदर्शक तत्त्वे’ या विषयावर जि. प. आदर्श शाळा चंद्रनगरचे मुख्याध्यापक मा. श्री. मनोज वेदक यांनी मार्गदर्शन केले. शाळा व्यवस्थापन समितीची भूमिका, जबाबदाऱ्या तसेच शाळेच्या गुणवत्तावाढीसाठी समितीचे महत्त्व त्यांनी स्पष्ट केले.
HPV लसीकरण सत्र ठरले विशेष लक्षवेधी
परिषदेतील HPV लसीकरणाचे सत्र विशेष लक्षवेधी ठरले. तालुका आरोग्य अधिकारी मा. श्री. डॉ. अमित वंजारी यांनी HPV लसीचे महत्त्व, भविष्यातील आरोग्याच्या दृष्टीने तिची उपयुक्तता तसेच लसीकरणाबाबतची शास्त्रीय माहिती शिक्षकांना दिली.
HPV संसर्गामुळे भविष्यात उद्भवू शकणाऱ्या आरोग्यविषयक समस्यांपासून संरक्षण मिळविण्याच्या दृष्टीने योग्य वयात HPV लसीकरणाचे महत्त्व त्यांनी स्पष्ट केले. लसीकरणाबाबत समाजात असलेल्या विविध शंका, गैरसमज आणि संभ्रमांचे प्रश्नोत्तरांच्या माध्यमातून प्रभावीपणे निरसन करण्यात आले. लसीची सुरक्षितता, आवश्यकता आणि मुलींच्या भविष्यातील आरोग्याच्या दृष्टीने तिचे महत्त्व याबाबत त्यांनी सविस्तर मार्गदर्शन केले.
विशेष म्हणजे, HPV लसीकरणाबाबत शास्त्रीय माहिती व योग्य मार्गदर्शन मिळाल्यानंतर उपस्थित शिक्षकांनी आपल्या स्वतःच्या मुलींना HPV लस देण्यास सकारात्मक संमती दर्शवली. त्यामुळे हे सत्र केवळ माहितीपर न राहता मुलींच्या आरोग्याच्या संरक्षणासाठी जागरूकता निर्माण करणारे आणि शिक्षकांना प्रत्यक्ष कृतीसाठी प्रेरणा देणारे ठरले.
शिष्यवृत्ती परीक्षा व शाळास्तरीय समित्यांचा आढावा
यानंतर शिष्यवृत्ती परीक्षेचा आढावा तसेच शाळास्तरावरील विविध समित्यांचे कामकाज या विषयावर गिम्हवणे केंद्राचे केंद्रप्रमुख मा. श्री. सुनील कारखेले यांनी मार्गदर्शन केले.
परिषदेचे निवेदन श्री. संतोष पाचांगले यांनी केले, तर आभार प्रदर्शन रेमजे मॅडम यांनी मानले.
विविध शैक्षणिक, प्रशासकीय आणि आरोग्यविषयक महत्त्वाच्या विषयांवर तज्ज्ञांचे मार्गदर्शन मिळाल्याने ही केंद्रस्तरीय शिक्षण परिषद शिक्षकांसाठी ज्ञानवर्धक आणि मार्गदर्शक ठरली. बदलत्या शैक्षणिक धोरणांची अंमलबजावणी, प्रभावी अध्यापन, विद्यार्थ्यांमध्ये सकारात्मक गुणांचा विकास तसेच मुलींच्या आरोग्याविषयी जनजागृती या विविध अंगांनी परिषदेला विशेष महत्त्व प्राप्त झाले. शिक्षकांनी उत्स्फूर्त सहभाग नोंदवत परिषद यशस्वी केली.
