डोंबिवलीत टिळकनगर सार्वजनिक गणेशोत्सव मंडळाचा भोंडला उत्साहात

डोंबिवलीत टिळकनगर सार्वजनिक गणेशोत्सव मंडळाचा भोंडला उत्साहात

२२५ महिलांचा पारंपरिक वेशभूषेत सहभाग

डोंबिवली (पूर्व)  l प्रतिनिधी 

डोंबिवलीच्या सांस्कृतिक जडणघडणीत मानाचे स्थान असलेल्या टिळकनगर सार्वजनिक गणेशोत्सव मंडळातर्फे महिलांसाठी आयोजित भोंडल्याला उत्स्फूर्त प्रतिसाद मिळाला. शनिवार, १७ ऑक्टोबर २०२६ रोजी सलग दुसऱ्या वर्षी आयोजित करण्यात आलेल्या या भोंडल्यात तब्बल २२५ महिलांनी पारंपरिक वेशभूषेत सहभागी होत महाराष्ट्राच्या लोकपरंपरेचा आनंद लुटला.

पूर्वनोंदणीला मिळालेल्या अभूतपूर्व प्रतिसादामुळे हा कार्यक्रम टिळकनगर शाळेच्या पेंढरकर सभागृहाऐवजी शाळेच्या मैदानावर आयोजित करण्यात आला. सुमारे दीड तास महिलांनी पारंपरिक भोंडल्याच्या गीतांवर हत्तीच्या प्रतिमेभोवती फेर धरून नृत्य केले. पाच वर्षांच्या चिमुरडींपासून ते ७५ वर्षांच्या आजींपर्यंत सर्व वयोगटांतील महिलांचा सहभाग हे या कार्यक्रमाचे विशेष आकर्षण ठरले.

कार्यक्रमासाठी उपस्थित महिलांचे हळदी-कुंकू लावून आणि चाफ्याचे फूल देऊन स्वागत करण्यात आले. भोंडला संपल्यानंतर मंडळातर्फे सर्व महिलांना खिरापत वाटण्यात आली. पारंपरिक संस्कृती जपणाऱ्या या सुंदर उपक्रमाचे उपस्थित महिलांनी कौतुक केले आणि उत्कृष्ट आयोजनाबद्दल मंडळाचे आभार मानले.

भोंडल्याची पारंपरिक माहिती मेघना आंबेकर यांनी दिली, तर उज्ज्वला वैद्य आणि पूजा शेंबेकर यांनी भोंडल्याची गीते सादर करण्याची जबाबदारी सांभाळली. नगरसेविका रंजना पेणकर यांनी उपस्थित राहून महिलांसोबत फेर धरत भोंडल्याचा आनंद घेतला. यावेळी मंडळातर्फे त्यांचा सन्मान करण्यात आला. ‘कॉटनकनेक्ट’च्या अनुजा पित्रे-कुलकर्णी यांनी या कार्यक्रमाला सहप्रायोजकत्व दिले होते. मंडळाच्या कार्यकर्त्या सोनाली गुजराथी यांनी नगरसेविका रंजना पेणकर आणि सहप्रायोजिका अनुजा पित्रे-कुलकर्णी यांचा सन्मान केला.

कार्यक्रमाच्या यशस्वी आयोजनासाठी सहकार्य करणाऱ्या सर्वांचे आणि उपस्थित महिलांचे मंडळाच्या प्रकल्पप्रमुख सिद्धी वैद्य-चिटणीस यांनी आभार मानले. पारंपरिक लोककला, गाणी आणि सामूहिक सहभागाच्या माध्यमातून सांस्कृतिक वारसा जपणारा हा भोंडला डोंबिवलीतील महिलांसाठी आनंददायी ठरला.