दुर्गराज रायगडावर शासनाचा अत्याधुनिक रोपवे उभारण्यास मान्यता

दुर्गराज रायगडावर शासनाचा अत्याधुनिक रोपवे उभारण्यास मान्यता

प्रवाशांना ५० ते १०० रुपयांत प्रवासाची शक्यता

रायगड, दि. २८ : दुर्गराज रायगडावर महाराष्ट्र शासनाच्या मालकीचा अत्याधुनिक रोपवे उभारण्यास भारतीय पुरातत्त्व विभागाकडून (ASI) मान्यता मिळाली असून, हा प्रकल्प पूर्ण झाल्यानंतर पर्यटकांना सध्या आकारल्या जाणाऱ्या सुमारे ३२५ ते ३५० रुपयांच्या भाड्याऐवजी ५० ते १०० रुपयांच्या दरात गडावर जाण्याची सुविधा उपलब्ध होण्याची शक्यता आहे. तसेच, गडावरील संवर्धन कामांसाठी लागणाऱ्या साहित्याच्या वाहतुकीवरील कोट्यवधी रुपयांच्या खर्चातही मोठी बचत होणार आहे, अशी माहिती रायगड विकास प्राधिकरणाने दिली.

सध्या दुर्गराज रायगडावर कार्यरत असलेल्या खासगी रोपवेद्वारे प्रतिव्यक्ती ३२५ रुपये भाडे आकारले जाते. तसेच संवर्धनाच्या कामांसाठी गडावर नेण्यात येणाऱ्या साहित्यावर प्रतिकिलो ६.३० रुपये वाहतूक शुल्क आकारले जात असल्याने संवर्धन प्रकल्पांचा खर्च मोठ्या प्रमाणात वाढत असल्याचे प्राधिकरणाने नमूद केले.

या समस्येवर तोडगा काढण्यासाठी महाराष्ट्र शासनाच्या मालकीचा स्वतंत्र आणि अत्याधुनिक रोपवे उभारण्याचा प्रस्ताव २०१८ पासून पाठपुराव्यात होता. या प्रस्तावासाठी छत्रपती संभाजीराजे यांनी केंद्रीय मंत्री नितीन गडकरी यांच्या माध्यमातून दिल्लीतील पुरातत्त्व विभागाकडे सातत्याने पाठपुरावा केला होता. त्यानंतर आता या प्रकल्पाला आवश्यक मान्यता मिळाली आहे.

प्रस्तावित शासकीय रोपवे सुरू झाल्यानंतर प्रवाशांकडून कमाल १०० रुपये किंवा त्यापेक्षा कमी भाडे आकारण्याचे नियोजन आहे. तसेच रायगडाच्या संवर्धनासाठी लागणाऱ्या साहित्याची वाहतूक नाममात्र दरात किंवा परिस्थितीनुसार विनामूल्य करण्याचाही विचार करण्यात आला आहे. त्यामुळे रायगडावरील संवर्धन आणि विकासकामांना मोठी गती मिळणार असल्याचे सांगण्यात आले.

सध्या नवीन रोपवेचा सविस्तर प्रकल्प आराखडा (DPR) तयार करण्याचे काम सुरू असून, आवश्यक प्रशासकीय प्रक्रिया पूर्ण झाल्यानंतर प्रत्यक्ष उभारणीच्या कामाला सुरुवात करण्यात येणार आहे.