पूर्णगडमध्ये अणुऊर्जा प्रकल्पाविरोधात रणशिंग

पूर्णगडमध्ये अणुऊर्जा प्रकल्पाविरोधात रणशिंग

“कोकण वाचवा”साठी संघर्ष समिती स्थापन करण्याचा निर्णय

रत्नागिरी | प्रतिनिधी

कोकणातील नैसर्गिक संपत्ती, शेती, मत्स्यव्यवसाय आणि पर्यटनाला धोका निर्माण करणारा प्रस्तावित अणुऊर्जा प्रकल्प कोणत्याही परिस्थितीत होऊ देणार नाही, असा निर्धार पूर्णगड पंचक्रोशीतील ग्रामस्थांनी व्यक्त केला आहे. रत्नागिरी तालुक्यातील पूर्णगड परिसरात प्रस्तावित अंबानी समूहाच्या अणुऊर्जा प्रकल्पाविरोधात आता जनक्षोभ उफाळून येत असून, लवकरच व्यापक जनआंदोलन छेडण्याचे संकेत स्थानिकांनी दिले आहेत.

पूर्णगड, मेर्वी, पावस, गावखडी, मावळंगे आणि आसपासच्या गावांतील नागरिकांची नुकतीच बैठक पार पडली. या बैठकीत केंद्र व राज्य सरकार स्थानिकांच्या भावना डावलून हा प्रकल्प लादण्याचा प्रयत्न करीत असल्याचा आरोप करण्यात आला.

ग्रामस्थांनी स्पष्ट शब्दांत सांगितले की, कोकण हे केवळ भौगोलिक क्षेत्र नसून लाखो लोकांच्या उपजीविकेचे साधन आहे. येथील आंबा, काजू, मत्स्यव्यवसाय, भातशेती, पर्यटन आणि जैवविविधतेवर कोणताही परिणाम होणार असेल तर तो स्वीकारला जाणार नाही.

पर्यावरणीय धोक्यांची भीती

बैठकीत उपस्थित नागरिकांनी संभाव्य अणुऊर्जा प्रकल्पामुळे निर्माण होणाऱ्या पर्यावरणीय परिणामांबाबत गंभीर चिंता व्यक्त केली.

त्यांच्या मते :

• समुद्रातील गरम पाण्याचा विसर्ग झाल्यास मत्स्यसंपदेवर परिणाम होऊ शकतो.

• आंबा, काजू व भातशेतीवर दीर्घकालीन परिणाम होण्याची भीती आहे.

• किनारी जैवविविधता आणि पर्यावरणीय संतुलन धोक्यात येऊ शकते.

• पर्यटन उद्योगाला मोठा फटका बसू शकतो.

• स्थानिकांना विस्थापनाचा सामना करावा लागू शकतो.

• भविष्यातील पिढ्यांच्या आरोग्याबाबत प्रश्नचिन्ह निर्माण होऊ शकते.

ग्रामस्थांनी जाहीर केले की, “कोकण हा उद्योगांचा बळी देण्याचा प्रदेश नाही. विकास हवा, पण तो पर्यावरणपूरक आणि स्थानिकांच्या हिताचा हवा.”

लवकरच स्थापन होणार संघर्ष समिती

बैठकीत सर्वपक्षीय आणि सर्वसमावेशक संघर्ष समिती स्थापन करण्याचा निर्णय घेण्यात आला. गावागावांत बैठका घेऊन जनजागृती करण्यात येणार असून, आवश्यक असल्यास मोठ्या प्रमाणावर आंदोलन उभारण्याचा निर्धार व्यक्त करण्यात आला.

उदय सामंत यांच्या भूमिकेकडे लक्ष

राज्याचे उद्योगमंत्री तथा रत्नागिरीचे पालकमंत्री उदय सामंत यांनी या विषयावर स्पष्ट भूमिका जाहीर करावी, अशी मागणीही ग्रामस्थांनी केली. स्थानिकांच्या भावना आणि पर्यावरणीय परिणामांचा विचार न करता कोणताही निर्णय घेऊ नये, असे मत यावेळी व्यक्त करण्यात आले.

बैठकीस उपस्थित मान्यवर

या बैठकीस किरण तोडणकर-गावकर (गावखडी), शशिकांत म्हादये (माजी सरपंच, मेर्वी), ओंकार अभ्यंकर, संतोष कुरतडकर, मंगेश म्हादये, विनोद साळुंखे, अभिजित डोंगरे, विजयकुमार शिंदे, अमृत पोकडे, अन्वर पेजे, तेयब दर्वेश, पूर्णगडच्या सरपंच सौ. सुहासिनी धानबा, मावळंगेच्या सरपंच सौ. नम्रता बिर्जे, उदयराज भाटकर, रामचंद्र आंबेरकर, माजी सरपंच गावडे आंबेरे यांच्यासह मोठ्या संख्येने ग्रामस्थ उपस्थित होते.