भालावलमध्ये विविध विकासकामांचा आढावा; दुष्काळसदृश परिस्थितीत उपाययोजनांचे नियोजन

भालावलमध्ये विविध विकासकामांचा आढावा; दुष्काळसदृश परिस्थितीत उपाययोजनांचे नियोजन

VB-GRAM-G, आवास योजना, जिल्हा वार्षिक योजना आणि अंगणवाडीच्या कामांची पाहणी

सावंतवाडी :

दुष्काळसदृश परिस्थितीच्या पार्श्वभूमीवर गावपातळीवर करावयाच्या उपाययोजनांचे नियोजन करण्यासाठी भालावल ग्रामपंचायत कार्यालयास भेट देण्यात आली. जिल्हा परिषद अध्यक्ष प्रमोद कामत यांच्या नेतृत्वाखाली मुख्य कार्यकारी अधिकारी अपूर्वा बासुर (IAS) यांनी विविध विकासकामांचा आढावा घेत आवश्यक मार्गदर्शन केले.

यावेळी १५वा वित्त आयोग, प्रधानमंत्री आवास योजना-ग्रामीण, जिल्हा वार्षिक योजना, अनुसूचित जाती-जमाती विकास कार्यक्रम आणि VB-GRAM-G यासह विविध योजनांच्या माध्यमातून सुरू असलेल्या कामांची माहिती घेण्यात आली. दुष्काळसदृश परिस्थितीत आवश्यक उपाययोजनांबाबतही चर्चा करण्यात आली.

भालावल येथे VB-GRAM-G अंतर्गत सन २०२६-२७ मध्ये करण्यात आलेल्या काजू लागवडीची पाहणी करण्यात आली. लाभार्थी रामचंद्र वामन परब यांच्या काजू लागवड क्षेत्राला भेट देऊन लागवडीच्या कामाची प्रत्यक्ष पाहणी करण्यात आली.

तसेच जिल्हा वार्षिक योजना २०२५-२६ अंतर्गत बांधण्यात आलेल्या प्राथमिक शाळेच्या नवीन इमारतीची पाहणी करण्यात आली. इमारतीची सद्यस्थिती आणि विद्यार्थ्यांसाठी उपलब्ध सुविधांचा आढावा घेण्यात आला.

यावेळी भालावल अंगणवाडीलाही भेट देण्यात आली. एकात्मिक बाल विकास सेवा (ICDS) अंतर्गत राबविण्यात येणाऱ्या विविध उपक्रमांची माहिती घेऊन बालकांना उपलब्ध असलेल्या सुविधा आणि अंगणवाडीच्या दैनंदिन कामकाजाचा आढावा घेण्यात आला.

गावपातळीवरील विविध योजनांची प्रभावी अंमलबजावणी तसेच उपलब्ध निधीचा योग्य वापर करून विकासकामांना गती देण्यावर यावेळी भर देण्यात आला.