महाराष्ट्रात शेतकऱ्यांसाठी विशेष टास्क फोर्स स्थापन
मुंबई l प्रतिनिधी
हवामान बदलामुळे वाढत्या कृषी संकटाला तोंड देण्यासाठी आणि शेतकरी आत्महत्या रोखण्यासाठी महाराष्ट्र शासनाने विशेष टास्क फोर्सची स्थापना केली आहे. कृषी आयुक्त सूरज मांढरे यांच्या आदेशानुसार स्थापन करण्यात आलेल्या या १० सदस्यीय समितीत आठ सरकारी अधिकारी आणि दोन तज्ज्ञांचा समावेश असून, या समितीची पहिली बैठक सोमवार, १६ फेब्रुवारी २०२६ रोजी पार पडली.
सरकारी आदेशानुसार, या टास्क फोर्सचे प्रमुख उद्दिष्ट शेतकऱ्यांच्या संकटामागील सामाजिक, आर्थिक, मानसिक तसेच शेतीशी संबंधित कारणांचा सखोल अभ्यास करणे आहे. हवामान बदलामुळे निर्माण होणाऱ्या कृषी समस्यांसाठी अंमलबजावणीयोग्य उपाययोजना सुचविणे, आत्महत्या प्रतिबंधासाठी सुरू असलेल्या विविध योजना एकात्मिक दृष्टिकोनाखाली आणणे आणि त्यामध्ये मानसिक आरोग्य सहाय्याचा समावेश करणे यावर भर देण्यात येणार आहे.
याशिवाय आपत्कालीन परिस्थितीसाठी विशेष कृती आराखडा तयार करणे, स्थानिक स्तरावर कृती आराखडे बनवून त्यांना प्रादेशिक योजनांशी जोडणे आणि उपाययोजनांच्या प्रभावी अंमलबजावणीसाठी स्वयंसेवी व निम-सरकारी संस्थांशी समन्वय साधणे, अशी जबाबदारीही समितीवर सोपविण्यात आली आहे.