मालवण बंदरावर सागरी गस्ती केंद्राच्या पोर्टा केबिनचे उद्घाटन

मालवण बंदरावर सागरी गस्ती केंद्राच्या पोर्टा केबिनचे उद्घाटन

सागरी सुरक्षेला मिळणार बळ

मालवण :

मालवण बंदर (जेट्टी) येथील सागरी गस्ती केंद्रासाठी उभारण्यात आलेल्या पोर्टा केबिनचे उद्घाटन मत्स्यव्यवसाय व बंदरे मंत्री तथा सिंधुदुर्ग जिल्ह्याचे पालकमंत्री नितेश राणे यांच्या हस्ते करण्यात आले. यावेळी आमदार निलेश राणे यांची प्रमुख उपस्थिती होती.

सिंधुदुर्ग जिल्ह्यातील हे पहिले पोर्टा केबिन असून सागरी सुरक्षेच्या दृष्टीने हा महत्त्वपूर्ण टप्पा मानला जात आहे. आगामी काळात जिल्ह्यातील १४ संवेदनशील ठिकाणी अशा प्रकारची पोर्टा केबिन उभारण्यात येणार असल्याची माहिती यावेळी देण्यात आली.

उद्घाटन प्रसंगी जिल्हाधिकारी तृप्ती धोडमिसे, पोलीस अधीक्षक डॉ. मोहन दहिकर, अपर पोलीस अधीक्षक नयोमी साटम, सागरी सुरक्षा शाखेचे पोलीस निरीक्षक राजेंद्र मगदूम तसेच पोलीस विभागाचे वरिष्ठ अधिकारी उपस्थित होते.

मालवण बंदर हे जिल्ह्यातील अत्यंत संवेदनशील लँडिंग पॉईंट मानले जाते. येथे मासेमारी बोटींची तसेच अन्य नौकांची मोठ्या प्रमाणात ये-जा सुरू असते. शिवाय, मालवण पर्यटनाचे प्रमुख केंद्र असल्याने दररोज मोठ्या संख्येने पर्यटक येथे भेट देत असतात.

या पार्श्वभूमीवर सागरी क्षेत्रावर प्रभावी देखरेख ठेवणे, संशयास्पद हालचालींवर लक्ष ठेवणे तसेच सागरी सुरक्षेबाबत अधिक सतर्कता निर्माण करणे या उद्देशाने पोलीस प्रशिक्षित मरीन होमगार्ड आणि सुरक्षा वॉर्डन यांच्यासाठी हे पोर्टा केबिन उभारण्यात आले आहे. या सुविधेमुळे किनारपट्टीवरील सुरक्षा यंत्रणा अधिक सक्षम होण्यास मदत होणार आहे.