“मुंबई-गोवा महामार्गावरून राजकारण तापले; १४ वर्षांच्या विलंबावरून गडकरींवर टीका, टोलमाफीची मागणी”
सिंधुदुर्ग (प्रतिनिधी): तब्बल १४ वर्षांपासून रखडलेल्या मुंबई-गोवा महामार्गाच्या कामावरून कोकणात राजकारण पुन्हा एकदा तापले आहे. केंद्रीय रस्ते वाहतूक मंत्री नितीन गडकरी यांनी हा महामार्ग मे २०२६ पर्यंत पूर्ण होईल, असे आश्वासन दिले असले तरी, या प्रकल्पाच्या विलंबाला तेच जबाबदार असल्याचा आरोप ठाकरे शिवसेनेच्या माजी पदाधिकाऱ्यांनी केला आहे.
मुंबई-गोवा महामार्गाचे काम सुरू होऊन दीड दशक उलटले, मात्र आजही अनेक ठिकाणी रस्त्याचे काम अपूर्ण अवस्थेत आहे. विशेषतः रत्नागिरी आणि रायगड जिल्ह्यांत काही ठेकेदारांनी काम अर्धवट सोडून दिल्याचे निदर्शनास आले आहे. सिंधुदुर्ग जिल्ह्यात काही प्रमाणात काम पूर्ण झाले असले तरी इतर भागांतील रखडलेली कामे नागरिकांच्या संतापाचे कारण ठरत आहेत.
या पार्श्वभूमीवर नितीन गडकरी यांनी महामार्गाच्या विलंबाबाबत जनतेची माफी मागितली आहे. मात्र ही माफी केवळ टोल वसुलीचा मार्ग मोकळा करण्यासाठी आहे का, असा सवाल उपस्थित करण्यात येत आहे. अपूर्ण रस्त्यामुळे झालेल्या अपघातांत हजारो कोकणवासियांचे प्राण गेले असून, त्यांच्या कुटुंबियांना सरकारकडून आर्थिक मदत दिली जाणार का, असा प्रश्नही उपस्थित करण्यात आला आहे.
महामार्गाच्या रखडलेल्या कामामुळे नागरिकांना मोठ्या अडचणींचा सामना करावा लागत आहे. खड्डे, अपूर्ण पूल, धोकादायक वळणे यामुळे अपघातांची संख्या वाढली असून प्रवाशांच्या जीविताला धोका निर्माण झाला आहे. त्यामुळे स्थानिक नागरिक आणि वाहनचालकांमध्ये तीव्र नाराजी व्यक्त होत आहे.
दरम्यान, १४ वर्षे अपूर्णावस्थेत असलेल्या या महामार्गासाठी माफी मागण्यापेक्षा कोकणवासियांना टोलमाफी देण्यात यावी, अशी ठाम मागणी करण्यात आली आहे. महामार्ग पूर्ण होईपर्यंत टोल आकारणी थांबवावी, अशीही भूमिका व्यक्त करण्यात येत आहे.
मुंबई-गोवा महामार्ग हा कोकणासाठी जीवनवाहिनी मानला जातो. पर्यटन, व्यापार आणि दळणवळणासाठी अत्यंत महत्त्वाचा असलेला हा मार्ग लवकरात लवकर पूर्ण व्हावा, अशी सर्वसामान्य नागरिकांची अपेक्षा आहे. आता केंद्र सरकार आणि संबंधित यंत्रणा याबाबत किती गांभीर्याने पावले उचलतात, याकडे संपूर्ण कोकणवासियांचे लक्ष लागले आहे.