राज्यातील ३,१९५ सरकारी रुग्णवाहिकांसाठी कॅशलेस पेट्रोकार्ड

राज्यातील ३,१९५ सरकारी रुग्णवाहिकांसाठी कॅशलेस पेट्रोकार्ड

आपत्कालीन आरोग्यसेवेत डिजिटल क्रांती

मुंबई, दि. २ :

महाराष्ट्र शासनाने आपत्कालीन आरोग्यसेवा अधिक पारदर्शक, वेगवान आणि कार्यक्षम करण्यासाठी राज्यभरातील ३,१९५ सरकारी रुग्णवाहिकांसाठी कॅशलेस पेट्रोकार्ड प्रणाली सुरू केली आहे. सार्वजनिक आरोग्यमंत्री प्रकाश आबितकर यांच्या हस्ते मुंबई येथे या महत्त्वाकांक्षी उपक्रमाचा शुभारंभ करण्यात आला.

एचपीसीएलच्या सहकार्याने राबविण्यात आलेल्या या प्रणालीमुळे रुग्णवाहिकांसाठी इंधन खरेदीतील रोख व्यवहार पूर्णपणे बंद होणार असून, इंधन वापरावर रिअल-टाइम डिजिटल देखरेख ठेवणे शक्य होणार आहे. यामुळे आर्थिक पारदर्शकता वाढेल, प्रशासकीय विलंब कमी होतील आणि रुग्णवाहिकांना इंधनाचा अखंड पुरवठा सुनिश्चित होईल.

या प्रसंगी मंत्री आबितकर यांनी आणखी एक महत्त्वपूर्ण घोषणा करत १०२ रुग्णवाहिका सेवा आता सर्व रुग्णांसाठी उपलब्ध करण्यात येणार असल्याचे सांगितले. यापूर्वी ही सेवा मुख्यतः माता व बालकांसाठी राखीव होती.

राज्यातील विद्यमान १०८ आपत्कालीन रुग्णवाहिका सेवेला पूरक व्यवस्था म्हणून १०२ सेवेला अधिक बळकट करण्याचे निर्देश संबंधित अधिकाऱ्यांना देण्यात आले आहेत. त्यामुळे आपत्कालीन परिस्थितीत नागरिकांना अधिक जलद आणि प्रभावी आरोग्यसेवा उपलब्ध होणार आहे.

या उपक्रमामुळे महाराष्ट्राची आपत्कालीन आरोग्य व्यवस्था अधिक आधुनिक, स्मार्ट आणि लोकाभिमुख बनण्यास मदत होणार असल्याचे आरोग्य विभागाने स्पष्ट केले आहे.