वेंगुर्ल्यात डास निर्मूलनासाठी ब्लीचिंग व फवारणी नियमित होते का ? – शैलेंद्र तुळसकर यांचा माहिती अधिकारातून तपशील मागविण्याचा प्रयत्न

वेंगुर्ल्यात डास निर्मूलनासाठी ब्लीचिंग व फवारणी नियमित होते का ? – शैलेंद्र तुळसकर यांचा माहिती अधिकारातून तपशील मागविण्याचा प्रयत्न

गेल्या वर्षभरातील ब्लीचिंग पावडर वाटप, फवारणीचे वेळापत्रक आणि कागदपत्रांची मागणी; नगरपरिषदेला ३० दिवसांत उत्तर देणे बंधनकारक

वेंगुर्ला, दि. २७ जुलै :

पावसाळ्याच्या पार्श्वभूमीवर डेंग्यू, मलेरिया आणि इतर डासजन्य आजारांचा धोका वाढत असताना वेंगुर्ला शहरात डास निर्मूलनासाठी ब्लीचिंग पावडरचे वाटप आणि डास प्रतिबंधक फवारणी नियमितपणे केली जाते का, याबाबत नागरिकांमध्ये संभ्रमाचे वातावरण आहे. हा संभ्रम दूर करण्यासाठी सामाजिक कार्यकर्ते शैलेंद्र तुळसकर यांनी माहिती अधिकार कायदा २००५ अंतर्गत वेंगुर्ला नगरपरिषदेकडे अर्ज दाखल केला आहे.

तुळसकर यांनी आपल्या अर्जामध्ये गेल्या एका वर्षात वेंगुर्ला नगरपरिषदेच्या हद्दीत ब्लीचिंग पावडरचे वाटप आणि डास प्रतिबंधक फवारणी किती वेळा करण्यात आली, त्याचे अधिकृत वेळापत्रक काय होते, तसेच संबंधित कामांची कागदपत्रे, अहवाल आणि नोंदींच्या प्रती उपलब्ध करून देण्याची मागणी केली आहे.

याबाबत बोलताना शैलेंद्र तुळसकर म्हणाले, “आरोग्य हा प्रत्येक नागरिकाचा मूलभूत अधिकार आहे. नगरपरिषदेच्या माध्यमातून राबविण्यात येणाऱ्या आरोग्यविषयक उपाययोजना प्रत्यक्षात नागरिकांपर्यंत पोहोचत आहेत का, याची माहिती लोकांना मिळणे आवश्यक आहे. पारदर्शकता आणि उत्तरदायित्व सुनिश्चित करण्यासाठी ही माहिती मागविण्यात आली आहे.”

माहिती अधिकार कायद्यानुसार संबंधित सार्वजनिक प्राधिकरणाला अर्ज प्राप्त झाल्यानंतर ३० दिवसांच्या आत माहिती देणे बंधनकारक आहे. नगरपरिषदेने दिलेल्या माहितीनुसार पुढील पाठपुरावा करण्यात येणार असल्याचेही तुळसकर यांनी स्पष्ट केले.

डासजन्य आजारांच्या प्रतिबंधासाठी स्थानिक स्वराज्य संस्थांची भूमिका महत्त्वाची मानली जाते. त्यामुळे वेंगुर्ला नगरपरिषदेच्या आरोग्य विभागाकडून या विषयावर काय माहिती समोर येते, याकडे शहरवासीयांचे लक्ष लागले आहे.